Kakang Kampret di Jalan Kompeni

Sak wise kapan gerakan para muda sing senengane baris-berbaris, mangumbara neng alam bebas, lan seneng ngabiantu wong liya dijenengake Pramuka ? Nek miturut aku kuwi mestine sak wise tahun 1963, amarga ceritaku neng ngisor iki kira-kira ing tahun 1961 sing piye gerakan kaya mangkono iku isih dijenengake Pandu. Kanggo bocah cilik sing isih ana Sekolah Rakyat (SR) ya melune Pandu kelas Kurcaci utawa Pandu Kurcaci.. 

Cerita singkate ing sekitar tahun 1961 mbakyuku sing paling mbarep saben Sabtu lan Minggu sore ngumpul neng Kantor Kelurahan Mojorejo minangka maelu kegiatan tambahan sing dijenengake Pandu Kurcaci. Aku sing wektu iku isih umur 5 tahunan isih durung ngerti mbakyu mbarepku kuwi neng Pandu Kurcaci diajari apa wae. Sing jelas, ketoke mbakyu mbarepku iku seneng banget buktiku nek pas mulih saka kegiatan Pandu Kurcaci ceritane akeh banget, wis pokoke nyerocos kaya pancuran neng Sedudo.. 

Sak ben bengi sak durunge wayah turu, aku lan mbakyuku sing nomor loro wis dikongkon leyeh-leyeh neng pat tidur. Sak wise adike loro mapan arep turu ning isih melek, mbakyu mbarepku ngadeg neng pat tidur lan wiwit nyanyi. Wektu iku sing jenenge pat tidur biasane saka wesi sing ana klambune soale akeh jingklonge ning wektu iku durung ana obat jingklong, sing ana ming sapu lidi sing disimpen neng pat tidur. Sapa ngerti ana sak wijining jingklong sing nakal lan nerobos klambu, wis mesti wae njur dipateni karo sapu lidi marang ibuku utawa mbakyu mbarepku.. 

Singkate cerita, balik neng awal crita, aku lan mbakyuku wing nomor loro wis dikongkon mapan turu karo mbakyuku sing mbarep, terus mbakyuku sing mbarep bergaya ala Pandu Kurcaci karo ngadeg nyanyi kanti swara sing banter banget :    

    Kakang Kampret di Jalan Kompeni

    (1,1,1,6,6,5,4,5,6,4)

    Tiap hari naik eksposisi

    (4,6,6.5,1up,2up,6.5,6,6.5,1up,6)

    Naik gunung turun gunung

    (4,4,4,2up,2up,2up,2up,2up)

    Kakang Kampret lalu kecemplung

    (4,4,4,1up,1up,1up,1up,1up)

    Kakang Kampret aduh aduh biyung   

    (4,4,4,6.5,6,5,6.5,6,5,4) 

Mangkono ping siji, diulangi maneh ping loro, diulangi maneh ping telu, terus mbakyuku sing mbarep ngongkon awake dewe cah loro nerokke deweke nyanyi, sampe lambe meniren lan ngelak pengin ngombe (ampun…ampun… wis mandega nyanyimu…).. 

Pas matane kene cah loro wis mendrip mendrip meh ngantuk, mbakyuku sing mbarep nutup nyanyinye karo lagu sing ora suwe diepek karo negara tetangga neng lor kuwi : 

    Rasa sayange

    Rasa sayang sayange

    Pandu Mojorejo

    Rasa saying sayange

(aku ora nyatet not baloke soale kowe kabeh sing maca iki rak wis mudeng tho karo nyanyian kuwi, lha mosok rung mudeng..pantes wae diepek karo negara tetangga..)

Matane kene cah loro wis sangsoyo dalu sangsoyo mendrip-mendrip, mbakyu mbarepku ya wis meniren lambene, sak wise ngombe banyu kendi sak gelas, mbakyuku melu mapan turu neng pat tidur…

Ing pungkasane, sing dienteni suwe teka. Ibu mlebu pat tidur lan melu mapan turu. Dadi posisi turune saka sing paling tengen : ibu, aku cah ragil, mbakyuku nomor loro, lan mbakyuku sing mbarep.. 

Kaya biasane Ibu ndongeng “Kancil nyolong timun“ episode 24 yakuwi kancil dikerangkeng karo pak tani arep dibeleh, ning karo akale sing IQne 164 kaya Miranda Gultom si kancil ngapusi gajah sing awake gede kanti cara si gajah dikongkon mlebu neng kerangkeng ngganteni si kancil soale mendunge arep ambhleg alias udan deres angin lesus gambul ora kira kira… 

Sakmene disik cerita iki. 

== Cuthel ==